Chëst ann al cuarto post
Dan otodì iel stat la fineles dl campiunat provinziel de scioh a scuadres, ulache la lia dal scioh de Gherdeina fej pea cun trëi scuadres. Tla serie A àn finà via che l ann passà ma iust nia ruvei sun l podest. L'autra doi scuadres fej tla serie C, ulache n se essa mbincià de jì su de categoria cun la segonda scuadra.
N sada ai 7 de merz iel unì jugà l ultimo turnus dl campionat provinziel de scioh a scuadres dla sajon 2014/15..
Serie A: la scuadres dla serie A se à dutes ancuntà a Tluses per jughé la finela deberieda. La scuadra de Gherdëina ova da se musré
cun la scuadra de Kaltern/Tramin, che fova bele dan chësta ultima ancunteda al prim post de tlassifica y chësc ne fova nce no plu da ti tò. L fova nsci da se aspité na ancunteda nteressanta ma nce scialdi ria. Purtruep à la scuadra dl Gherdëina I perdù bëndebo tler cun 5:1. L sëul pont per l Gherdëina ie unì fat da Moroder Thomas, che à jugà sun segonda mëisa. Thomas à fat duta la nuef partides de campionat y cun 7.5 ponc sun 9 iel l jugadëur che à fat tla serie A l plu ponc de duc i jugadëures de Südtirol te chësta sajon.
La scuadra Gherdëina I à stlut ju la sajon al cuarto post. Venciù à per l terzo iede l Kaltern/Tramin dan Naturns Jambo y SSV Bruneck.
Serie C: nce la segonda y terza scuadra de Gherdëina à jugà l’ultima partida te chësta sajon.
L Gherdëina II ie furnà a Bulsan per se museré cun l Richter/Lask. Prinoth Franz, che à jugà sun prima mëisa, à fat na remis y Überbacher Sebastian, cuarta mëisa, à venciù si partida. L’autra partides an perdù y nsci à l Richter/Lask venciù cun 3½ a 1½ .
La terza scuadra à jugà n cësa contra Cedas Iveco, perdan cun 1:4. L pont per l Gherdëina III ie ruva da Elisabeth Delago y Nadia Kasslatter, segonda y terza mëisa, che à tramdedoves fat na remis.
Tla tlasifica finela tla serie C ie l Gherdëina 2 ruva al segondo post, do l Ehrenburg y dan Arci Scacchi BZ.
Cun l segondo plazament an purtruep nia plu la puscibilità de jì sù tla serie B y nsci jugherà l Gherdëina 2 nce tla proscima sajon inò tla serie C.
La scuadra Gherdëina 3 se à tlasifica decima (ed)