Cuinto y sesto di de campionat provinziel a scuadres de schach
Ai 10 de jené iel uni jugà l cuinto turno dl campionat provinziel a scuadres, chësc iede ova duta la scuadres dl Gherdëina da jughé oradecà. La prima scuadra ie furneda a Naturns. Bele danora fovel da se aspité na ancunteda scialdi nteressanta y ria. L Naturns toca pra la scuadres plu stersces y ie dessegur pra chëles che juega per l titul de campion provinziel. A la scuadra de Gherdëina ti ala n chësc di purtruep nia drë butà. Moroder Stephan, Moroder Thomas y Grossi Christian (1., 3. y 5. mëisa) à arjont na remis, l’autra partides ie jites perdudes y nsci à la scuadra dl Naturns venciù bëndebo tler cun 4 ½ a 1 ½ .
Demetz Ernst, cun 5/6 ponc un
di jugadëures plu stersc tla serie C
Miec ti iela jita a la scuadra Gherdëina II, che ie furneda a Steinegg. I jugadëures ie stac boni de vëncer chësta ancunteda cun 3:2. I ponc ie unic fac da Prinoth Franz sun prima mëisa, Moroder Richard sun terza y Überbacher Sebastian sun cuarta mëisa. L Gherdëina 2 ie nscí sun l secondo post dla tlassifica, cun me un n pont de manco che la scuadra dl Ehrenburg y mantën nsci la puscibilità de pudëi se cualifiché per la proscima sajon per la serie B. La terza scuadra à jugà contro l Ehrenburg II, una dla scuadres plu stersces tla serie C, y à perdú cun 3:2. I ponc per l Gherdëina ie unic fac da Grossrubatscher Johann, che à venciú si partida y da Taschler Manuel y Kasslatter Matthias, che à tramedoi fat na remis.
L sesto turno à po duta la scuadres inò jugà n cësa. La prima scuadra ova da se musré cun l Arci Scacchi BZ. Moroder Stephan, che à jugà sun prima mëisa à venciú si partida, coche nce Thomas Moroder sun terza mëisa. L’autra cater partides ie unides perdudes y l Arci Scacchi BZ à batú l Gherdëina I cun 4:2. Nsci se abina la prima scuadra al mumënt sun l cuarto post te tlassifica, do l Kaltern, l Bruneck y l Naturns.
La segonda scuadra à jugà contro l Brixen/Milland II y ie stata bona de vëncier chësta ancunteda tler cun 4 ½ a ½. Grossrubatscher Johann à jugà sun prima mëisa y à fat na remis, Knottner Klaus, Moroder Richard, Demetz Ernst y Delago Elisabeth à venciù si partides. Chësta vënta fova mpurtanta per la scuadra, che mantën nsci l segondo post te tlasifica generela, do la scuadra de Ehrenburg.
La terza scuarda à jugà contro l Arci Scacchi BZ III y à purtruep perdú tler cun 0:5.
Bele chësta sada unirà jughà l setimo turno de campionat. La prima y la terza scuadra furnea a Bulsan y juega contro l Richter/Lask y l Richer/Lask II.
La segonda scuadra furnea a Ehrenburg. L Ehrenburg ie al mumënt prim te tlasifica, y nsci sará chësta na partida decisiva per arjonjer l post per pudëi jughé tla proscima sajon tla serie B.