Campiunat Provinziel a scuadres de scioh
(gp) L setimo turno dl campionat de Südtirol a scuadres, dl 7 de fauré ie finà via bën per la prima scuadra dla Lia scioh de Gherdëina, vencian 4-2 contra l J.Richter/Lask BZ na partida oradeca ulache i ani passei se aun for fat dassen ert. Stefan Moroder, Thomas Moroder y Christian Grossi à venciù si partides. David Dejori y Herbert Grossrubatscher a fat n remi.
Resultat a pèr per l Gherdëina II che “me” arjont n 2½-2½ a Ehrenburg. Klaus Knottner à venciù si partita, Franz Prinoth, Johann Grossrubatscher y Richard Moroder a fat na remi. L sarà dassen rie a chesc pont ti jì mo dant al Ehrenburg II per pudei jì su te serie B.
Manco butà ti ala al’incontra al Gherdëina III, perdan per 4-1 contra l J.Richter/Lask BZ II. Da auzé ora ie la venta de Manuel Taschler sun prima mëisa.
Doi enes do, ai 21 de fauré, fova n’autra ria partida sun l calender per la prima scuadra da tlo. A Urtijëi fova aspità l Gries Bulsan che mpué a marueia ie unì batù per 3½-2½. Stefan Moroder à arjont n’autra boniscima prestazion, batan chest iede l nuev campion provinziel ndividuel, Maximilian Spornberger, te na partida dassen cumbatuda. N bon campionat garata ënghe a Thomas Moroder che cun 6,5 ponc su 8 ie l “topscorer” dla serie A. Venciu à mo Matthias Kasslatter si prima partida tla serie plu auta y mez pont à fat Ruben Bernardi.
La prima scuadra dla Lia Scioh Gherdëina ie al mumënt terza, cun 11 ponc canche la prima tlassificheda, l Kaltern/Tramin cun 14 ponc, ie bele matematicamenter campion provinziel y venc l titul per l terzo iede.
For la medema sada à l Gherdëina II venciù per 3½-1½ contra l Arci Scacchi BZ III. Franz Prinoth, Klaus Knottner y Richard Moroder a fat na remi. Manuel Taschler y Überbacher Sebastian a venciù si partita. La segonda scuadra resta segonda te tlassifica dla serie C-ost.
Perdù à l Gherdëina III per ½-4½ contra l Wipptal Schach. Seula a fé mez ponti e stata Elisabeth Delago.