Jugadëures dla lia schach Gherdëina pra turnois a Bad Wörishofen y Bulsan
Ntan l’enes passedes ne ie nia me unì jugà l campionat provinziel a scuadres, n valgun jugadëures dla lia à tëut pert pra turnois a Bad Wörishofen y a Bulsan.
Bad Wörishofen: Dal 27.02. ai 07.03 ie unì metù a ji a Bad Wörishofen (D, Allgäu) n turnoi de schach. Te n dut à fat pea
bën 293 jugadëures (Open: 192 jugadëures, turnoi per Senioren: 101 jugadëures) de 18 nazions, danter
chisc 35 jugadëures cun n titul (GM, IM, FM).
Dla lia de Gherdëina fovel Ruben Bernardi a fé pea pra chësc turnoi. Te n dut fovel da jughé nuef partides y ël ie pia via scialdi bën cun na vënta tl prim turno y na remis tl segondo, ulache l à jugà cun l GM Romanishin Oleg dl Ucraina. Te i proscimi set turni iel stat bon de vëncer trëi partides y de fé mo na remis, ruvan nsci a n resultat sterch de 5 sun 9 ponc. Nce sce ël ne ie nia stat bon de nuzé la ucajions ti ultimi doi turni, ie l resultat tres i tres positiv y ël ie scialdi cuntënt de coche ie jit chësc turnoi, conta Ruben. Bel ti savoa che l ova l’ ucajion de jughé tl terzo turno contro l grech GM Halkias Stelios che ie a la fin deventà prim.
Halkias tucova pra i favoric dl turnoi. Dan l ultimo turno fovel sun l segondo post,
ma cun na vënta iel stat bon de se tlasifiché prim cun 7.5 ponc, dan GM Pap Misa (Serbia) y Khenkin Igor (GER), tramedoi cun 7 ponc.
Ruben Bernardi se a tlasificà sun l boniscim 51ejim post y à cun chësc bon resultat davanià 17 ponc ELO.
Bulsan: Nce a Bulsan iel uni metù a jì n turnoi Open, chëst ann oven da festejé n jubiläum cun la bën decima edizion de chësc turnoi.
I jugadëures ie unic spartì su te doi grupes, Open A y Open B, jugan cin partides. Te n dut fovel 80 jugadëures che à fat pea, tra chisc nce trëi dla lia de Gherdëina. Dejori David à jugà tl Open A, se messan musré nsci cun jugadëures scialdi stersc, tra chisc nce n valguni di mieures dl Südtirol. Do cin turni se al tlasificà cun un n pont sun l 38ejim post.
L turnoi à venciù cun 4.5 ponc sun 5 Spornberger Maximilian,
dan De Santis Alessio y Bonagura Stefano, tramedoi cun 4 ponc.
Tl Open B à jugà Demetz Ernst, che ie ruvà sun l 27ejim post cun doi ponc y Christine Perathoner.
Ëila à jugà n turnoi dassen sterch, fajan bën 3.5 ponc sun 5. Tla tlasifica finela iela nsci ruveda sun l boniscim 8. post.
L Open B ie unì venciù da Grudina Marco, dan Unterkofler Alex y Magri Leonardo.